Xuan Bello
Xuan Bello ye
ún de los escritores más destacaos de la lliteratura contemporánea en llingua
asturiana.
Xuan Bello
Fernán nació en Paniceiros (Tieu) en 1965, anque treslladose a vivir a Tudela
Veguín y , más tarde, a Uviéu. Nesta ciudá, na Facultá de Filoloxía y na
tertulia Oliver coincide con escritores como Antón García, José Luis García
Martín, Víctor Botas, Berta Piñán, Fonsu Velázquez, Xuan Ignaciu Llope o José
Luis Piquero.
En 1982, con
malapenes 16 años espublizó’l primer llibru de poemes, escritu n’asturianu
occidental Nel cuartu mariellu. El so
llabor poéticu, aparte de los poemes y versiones espublizaes en revistes
universitaries y en Lletres asturianes, siguió con El llibru de les cenices (1988), Los nomes de la tierra (1991) , El
llibru vieyu , col qu’algamó’l premiu Teodoro Cuesta de poesía en 1993 y Los Caminos Secretos (1996). En 1999
espublizose una antoloxía billingüe (asturianu-castellán) de la so poesía, col
títulu de La Vida Perdida.
Xuan Bello ye
ún de los principales animadores de la lliteratura asturiana, gracies a les sos
traducciones, especialmente d’autores portugueses o a les collaboraciones en
revistes como Clarín, Adréi y Zimbru, siendo cofundador de les dos últimes con Berta
Piñán y Esther Prieto respectivamente. Tamién tien
publicao nos diarios La Nueva España y El Comercio y nel selmanariu Les
Noticies, del que foi direutor ocho años. Anguaño encárgase de la estaya
dixital del mediu. En 2005 foi responsable de la la organización de la Xunta
d’Escritores Asturianos.
Sícasí, la
fama lliteraria llego-y gracies a la traducción al castellanu de Hestoria Universal de Paniceiros, que
recibió’l premiu Ramón Gómez de la Serna y convirtióse nun de los llibros más
destacaos polos críticos españoles en 2003. Otros llibros suyos, a caballu ente
l’ensayu y el rellatu, son Pantasmes,
mundos, laberintos (1996), La memoria
del mundu (1998), Meditaciones nel
desiertu (2003) y Los Cuarteles de la
memoria (2003).
En 2009
recibió'l Premiu de la Crítica RPA de Lliteratura, pol llibru Ambos mundos: poesía 1988-2009.
Nel añu 2017,
Xuan Bello alzóse col Premiu Nacional de Lliteratura Asturiana, na so primera
edición, un premiu de carácter triañal qu'entama l'Academia de la Llingua
Asturiana. El xuráu destacó la estraordinaria
calidá y relevancia de la so trayeutoria lliteraria (qu'amiesta poesía y
narrativa), que vien xugando un papel fundamental na dignificación y
visualización de la lliteratura asturiana y de la propia llingua, asina como
pola mor de la proyeición estatal ya internacional qu’algama la so obra con
numberoses traducciones a estremaes llingües.[1]. Tamién nel añu
2017 algamó'l Premiu Teodoro Cuesta de Poesía.
consultada 6/05/2018 dende
https://es.wikipedia.org/wiki/Xuan_Bello
No hay comentarios:
Publicar un comentario